ഇന്‍കംടാക്സ് ഇ-ഫയലിങ് പോര്‍ട്ടലിലെ തകരാറുകള്‍ പൂര്‍ണമായും പരിഹരിക്കാന്‍ ഇതുവരെ കഴിഞ്ഞിട്ടില്ല
ആദായ നികുതി വകുപ്പ് പുതിതായി അവതരിപ്പിച്ച ഇന്‍കംടാക്സ് ഇ-ഫയലിങ് പോര്‍ട്ടലിലെ തകരാറുകള്‍ പൂര്‍ണമായും പരിഹരിക്കാന്‍ ഇതുവരെ കഴിഞ്ഞില്ല. ഏതാനും ദിവസങ്ങള്‍ക്കുള്ളില്‍ തകരാറുകള്‍ പരിഹരിക്കുമെന്ന് ധനമന്ത്രി നിര്‍മല സീതാരാമന്‍ അറിയിച്ചു. തകരാറുകള്‍ കണ്ടെത്തി ഘട്ടംഘട്ടമായി പരിഹരിച്ചുവരികയാണ്. ഇതുസംബന്ധിച്ച്‌ എല്ലാ ആഴ്ചയും നന്ദന്‍ നിലേകനി ആശയവിനിമയം നടത്തുന്നുണ്ടെന്നും ധനമന്ത്രി പറഞ്ഞു. റിട്ടേണ്‍ നല്‍കുന്നതിനുള്ള സമയപരിധി നീട്ടുന്നകാര്യത്തില്‍ ഇപ്പോള്‍ തീരുമാനമെടുത്തിട്ടില്ലെന്നും മന്ത്രി പറഞ്ഞു.
ജൂണ്‍ ഏഴിനാണ് പുതിയ ആദായനികുതി ഇ-ഫയലിങ് പോര്‍ട്ടല്‍ പുറത്തിറക്കിയത്. അന്നുതന്നെ പോര്‍ട്ടിലിലെ തകരാറുകളെക്കുറിച്ച്‌ വ്യാപകമായി പരാതികളുയര്‍ന്നിരുന്നു.
രണ്ടുമാസം പിന്നിട്ടിട്ടും തകരാര്‍ പരിഹരിക്കാന്‍ സോഫ്റ്റ് വെയര്‍ രൂപകല്പനചെയ്ത ഇന്‍ഫോസിസിന് ആയിട്ടില്ല. റിട്ടേണുകള്‍ പ്രൊസസ് ചെയ്യുന്ന സമയം 63 ദിവസത്തില്‍നിന്ന് ഒരു ദിവസമായി കുറയ്ക്കുന്നതിനും റീഫണ്ട് വേഗത്തില്‍ നല്‍കുന്നതിനും മറ്റുമാണ് പുതുതലമുറ ഫയലിങ് സംവിധാനം തയ്യാറാക്കുന്നതിന് 2019ല്‍ ധനകാര്യമന്ത്രാലയം ഇന്‍ഫോസിസുമായി കരാറിലെത്തിയത്. ഇതിനായി 2019 ജനുവരി മുതല്‍ 2021 ജൂണ്‍വരെയുള്ള കാലയളവില്‍ 164.5 കോടി രൂപയാണ് ഇന്‍ഫോസിസിന് നല്‍കിയത്.
