രജിസ്ട്രേഷൻ ഇല്ലാതെ നിക്ഷേപ ഉപദേശം നല്‍കിയതില്‍ യൂട്യൂബർക്കെതിരേ നടപടിയെടുത്ത് സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ(സെബി).
19 ലക്ഷം സബ്സ്ക്രൈബേഴ്സുള്ള യൂട്യൂബറായ രവീന്ദ്ര ബാലു ഭാരതിക്കും അദ്ദേഹത്തിന്‍റെ സ്ഥാപനം രവീന്ദ്ര ഭാരതി എഡ്യൂക്കേഷൻ ഇൻസ്റ്റിറ്റ്യൂട്ടിനുമെതിരേയാണ് സെബി നടപടി.
നിയമവിരുദ്ധ പ്രവർത്തനത്തിലൂടെ സന്പാദിച്ച 9.5 കോടിരൂപ തിരിച്ചടക്കണമെന്നാണ് സെബിയുടെ ഉത്തരവ്. 2025 ഏപ്രില്‍ 4 വരെ സെക്യൂരിറ്റീസ് മാർക്കറ്റില്‍ പങ്കെടുക്കുന്നതില്‍ നിന്ന് വിലക്കുകയും ചെയ്തു.
അനുമതിയില്ലാത്ത നിക്ഷേപ ഉപദേശങ്ങള്‍, വ്യാപാര ശിപാർശകള്‍, നിർവഹണ സേവനങ്ങള്‍ എന്നിവയിലൂടെ ഭാരതിയും അദ്ദേഹത്തിന്‍റെ കന്പനിയും അനുഭവപരിചയമില്ലാത്ത നിക്ഷേപകരെ ഓഹരി വിപണിയിലേക്ക് ആകർഷിച്ചതായി സെബിയുടെ അന്വേഷണത്തില്‍ കണ്ടെത്തി.
രണ്ട് യൂട്യൂബ് ചാനലുകളിലായി 19 ലക്ഷം സബ്സ്ക്രൈബർമാരുള്ള ഭാരതി, തന്നെ പിന്തുടരുന്നവർക്ക് അപകടകരമായ നിക്ഷേപങ്ങള്‍ പ്രോത്സാഹിപ്പിക്കുന്നതിന് തന്‍റെ സ്വാധീനം പ്രയോജനപ്പെടുത്തിയതായി കണ്ടെത്തി.
സാന്പത്തിക പിഴകള്‍ക്കും തിരിച്ചടവ് ഓർഡറിനും പുറമേ, 2025 ഏപ്രില്‍ വരെ ഏതെങ്കിലും സെക്യൂരിറ്റീസ് മാർക്കറ്റ് പ്രവർത്തനങ്ങളില്‍ ഏർപ്പെടുന്നതില്‍ നിന്ന് ഭാരതിക്കും അദ്ദേഹത്തിന്‍റെ കന്പനിക്കും നിരവധി അസോസിയേറ്റുകള്‍ക്കും സെബി വിലക്ക് ഏർപ്പെടുത്തിയിട്ടുണ്ട്. ഭാരതിക്കും കൂട്ടാളികള്‍ക്കും 10 ലക്ഷം രൂപ പിഴ ചുമത്തിയിട്ടുണ്ട്.
