SIP എന്നാൽ എന്താണ്?
മാസം തോറും ഒരു നിശ്ചിത തുക ഓഹരികളിൽ നിക്ഷേപിച്ചു കൊണ്ട് ഒരു സമ്പദ് ഘടന വളർത്തിയെടുക്കുന്ന മ്യൂച്ചൽ ഫണ്ട് സംവിധാനമാണ് എസ് ഐ പി അഥവാ സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ.ഈ പദ്ധതിയിലൂടെ നിശ്ചിത തുക നിക്ഷേപിക്കുമ്പോൾ വിപണിയുടെ തളർച്ചയിൽ കൂടുതൽ മ്യൂച്ചൽ ഫണ്ട് യൂണിറ്റുകളും ,വിപണി കയറുമ്പോൾ കുറച്ചു യൂണിറ്റുകളും വാങ്ങി ഓരോ യൂണിറ്റിനുമുള്ള ശരാശരി ചിലവ് നിയന്ത്രിക്കാൻ നിക്ഷേപകന് കഴിയുന്നു എന്നതാണ് SIP യുടെ സവിശേഷത.
’ലോംഗർ ദി പിരീയഡ്, മോർ ദ വെൽത്’ എന്ന തത്വമാണ് എസ്ഐപി നിക്ഷേപത്തിന്‍റെ തത്വം. എല്ലാ മാസവും ഒരു നിശ്ചിത തുക നിശ്ചിത ദിവസം ദീർഘകാലത്തേക്ക് നിക്ഷേപിക്കുന്ന രീതിയാണിത്. നിക്ഷേപകാലയളവ് എത്രമാത്രം കൂടുന്നുവോ അത്രത്തോളം വരുമാനവും ലഭിക്കും. അതായത് വലിയ തുകയ്ക്കുള്ള എസ്ഐപികൾ കുറച്ചു കാലത്തേക്ക് തുടരുന്നതിനേക്കാൾ പ്രയോജനപ്രദമാണ് ചെറിയ തുകകൾ ദീർഘകാലത്തേക്ക് എസ്ഐപിയായി നിക്ഷേപിക്കുന്നത്. കോസ്റ്റ് ആവറേജിംഗ് എന്ന തത്വമാണ് എസ് ഐ പിയുടെ പിന്നിലുളളത്. വില ഉയരുന്പോൾ കുറഞ്ഞ യൂണിറ്റുകൾ ലഭിക്കുന്നു. വില താഴുമ്പോൾ കൂടുതൽ യൂണിറ്റുകളും. ഇത് യൂണിറ്റിന്‍റെ ശരാശരി വില കുറയുവാൻ സഹായിക്കുന്നു.എസ്ഐപി വഴി ഏതു സമയവും മ്യൂച്വൽ ഫണ്ടിൽ നിക്ഷേപിക്കുവാൻ അനുയോജ്യമാണ്.എവിടെ നിക്ഷേപിക്കണമെന്നതിനും പ്രസക്തിയില്ല. സാമ്പത്തിക വിദഗ്ദ്ധരുടെ ഗവേഷണത്തിന്‍റെ ഫലമായി വളരെ വൈവിധ്യമാർന്ന ഓഹരികളാണ് നിക്ഷേപത്തിനായി തെരഞ്ഞെടുക്കുന്നത്.
എസ്ഐപിയിൽ ഓരോ മാസവും നിശ്ചിത തുക തെരഞ്ഞെടുത്ത ഇക്വിറ്റി മ്യൂച്വൽ ഫണ്ട് പദ്ധതിയിൽ നിക്ഷേപം നടത്തുന്നു. ഓഹരി വിപണിയിലെ ഉയർച്ച താഴ്ചകൾക്കൊന്നും മുഖംകൊടുക്കാതെ, അച്ചടക്കത്തോടെ, ക്രമമായി എല്ലാ മാസവും നിശ്ചിത തീയതിയിൽ ഈ നിക്ഷേപം നടത്തിക്കൊണ്ടിരിക്കുന്നു. ഇക്വിറ്റി മ്യൂച്വൽ ഫണ്ട് നിക്ഷേപത്തിനാണ് എസ്ഐപി ഏറ്റവും യോജിച്ചതായി കാണുന്നത്. പ്രതിമാസമോ ത്രൈമാസമോ ആയി ചെറിയ തുകകൾ നിക്ഷേപം നടത്തുവാൻ അനുവദിക്കുന്നവെന്നതാണ് ഇതിന്‍റെ ഏറ്റവും ആകർഷകമായ വശം. അതായത് ഒരോ മാസവും ഒരു നിശ്ചിത ദിവസത്തെ നെറ്റ് അസറ്റ് വാല്യുവിൽ മ്യൂച്വൽ ഫണ്ടിന്‍റെ യൂണിറ്റുകൾ വാങ്ങുന്നു.
വിപണിയുടെ കയറ്റിറക്കങ്ങളിൽ ആശങ്കപ്പെടാതെ വിപണിയുടെ ഉയർച്ചയും താഴ്ചയും ഒരുപോലെ അവസരമാക്കാൻ എസ്ഐപി നിക്ഷേപത്തിലൂടെ സാധിക്കും. സ്ഥിര വരുമാനക്കാർക്കും താരതമ്യേന വരുമാനം കുറഞ്ഞവർക്കും മെച്ചപ്പെട്ട സാമ്പത്തിക ശേഷിയുള്ളവർക്കും അവരവരുടെ ചുറ്റുപാടുകൾ അനുസരിച്ച് വ്യത്യസ്ത ക്ലാസുകൾ തെരഞ്ഞെടുക്കാം എന്നത് എസ്ഐപിയുടെ പ്രത്യേകതയാണ്.ഏതു വലിയ ധനകാര്യ ലക്ഷ്യവും ഇതിലൂടെ നേടിയെടുക്കാൻ സാധിക്കും. ബുൾ, ബെയർ വിപണികളുടെ എല്ലാ ഘട്ടത്തിലും ഒരേപോലെ നിക്ഷേപം നടത്തുവാൻ എസ്ഐപി സഹായിക്കുന്നു.
